أم محمد ماتت لما سمعت خبر موت محمد

 

على خلفية الأحداث الدامية التى تدور الآن في سيناء (الشيخ زويد ورفح) واستشهاد 60 جنديًا من "خير أجناد الأرض" برصاص الغدر والإرهاب.. كتب الأستاذ أحمد رشدي هذه القصة من وحى معاناته ومعايشته للأحداث، والتى ربما حدثت بالفعل..

 

 فى قرية فى قلب الصعيد، وبيت من طين جنب ترعة على الطريق، قبل المغرب، رن التليفون اللى فوق زير قديم جنب الفرن، قامت الست الكبيرة تتعكز بعد ما ندهت على بنتها تخلص العشاء علشان الشمس غابت والمغرب خلاص، رفعت السمعة:
*** أيوة، مين؟
- السلام عليكم يا أمى، أنا صابر زميل محمد ابنك فى الجيش.
*** وعليكم السلام،خير يا صابر يا ولدى، أمحمد حصلت له حاجة؟ خير يا ولدى قلبى متوغوش عليه، طمنى يا ولدى.
- صابر: عمى الحاج موجود يا أماه؟
*** يا ولدى طمنى، الله يخليك أمحمد جرت له حاجة، عمك لسه فى الغيط هو ومحمود ولدى، يا واد يا صابر حرام عليك قلبى هيوقف يا ولدى، ماله أمحمد؟
- يا أماه أصلى أنا زعلان من محمد.
*** ليه يا صابر يا ولدى ده انتوا أخوات وهوعيقول مليش غير صابر و أنا يا ولدى مطلعتش من الدنيا غير بأمحمد ومحمود والحلوة أختهم وأنت رابعهم.
- احكمى بيناتنا يا أماه، لو أنا عطيتك أمانة وجيت بعد فترة أخدتها، تزعلى منى يا أماه؟
*** لاه يا ولدى، ده حقك و لما يرجع محمد هقطع لك ودانه بس لازم تحضر فرحه السبوع اللى جاى.
- إمبارح يا أماه بعد ما صلينا الفجر قعدت أنى ومحمد وكنا فى سيرتكم وبيقولى نفسى يا صابر يا أخويه أشيل الحمل عن عمك الحاج و كلها كام شهر ونخلص وارعى الأرضيات وكنا بنغنى – دموع صابر غرقت رمل سيناء-....

بلادى بلادى بلادى..... لكِ حبى و فؤادى

مصر يا أم البلاد.... انتى غايتى والمراد

*** يا قلبى يا ولدى، يا صابر يا ولدى،الدموع فرت من عنيه، طمنى على أخوك أمحمد يا واد....

- محمد مات يا أمى، محمد اتقتل غدر مع أخواتنا على الحدود، محمد شهيد يا أماه وهيتزف عريس فى الجنة وهيفطر مع سيدنا النبى – صل الله وعليه و سلم – يا أماه ردى عليه، الو... الو.... الو..... ماتت أم محمد
*** من أصعب اللحظات على الأم والأب لما يفقدوا النور اللى بيشوفوا بيه، لما شمسهم تغيب، لما ابنهم يتقتل غدر.

*** والنهارده مصر أم الدنيا فقدت 60 من ولادها الفوارس كانوا واقفين على الحدود زى الأسود، عزاؤنا الوحيد أنهم بإذن الله  شهداء وإنهم  كانوا بيحموا الأرض والعرض.
*** اللهم صبر أمهات و آباء الشهداء وأنزل عليهم السكينة والصبر واحفظ مصرنا وانصرنا على القوم الظالمين وانتقم من القتلة والمجرمين