حلواني فى الشارع.. مشبك وبلح الشام

جريدة الفتح اليوم في الشارع مع الباعة،لنعرف ونتعرف على آمالهم وآلامهم، رمضان السيد إسماعيل، 28 عام،بائع حلويات (بسبوسة مشبك جلاش بلح الشام)
- إيه حكايتك مع البسبوسة يا أ.رمضان؟

مشروع بدأت به حياتي بدل القاعدة، كنت شغال مع واحد وتعلمت منه الصنعة واستلفت 2000جنيه واشتريت " تروسكل " وبصراحة قصدت واحد معرفه يتوسط لي عند حلواني كبير من دمياط عشان يديني بضاعة بالأجل.
- رأس مال الموضع تقريبا كام؟

راس مال المشروع 3000جنيه،اشتريت العده وكان معايا فلوس، كنت اشترى توك توك واشتغلت عليه، التروسكل الجديد ب18 ألف جنيه والمستعمل 10آلاف جنيه،وبتعامل مع تاجر من دمياط بينزل بضاعه للبائعين وكل خمسة أيام بدفع له 600جنيه وأخد حلويات،الحمد لله ماشى الحال.

- عربة الحلويات تكسب كام في اليوم؟
مكسبى كل يوم،حوالى 45جنيه لما تكون الحالة كويسة وأحيانا استلف فلوس علشان اجيب حق البضاعه وداخل علي جواز وعايز أكمل حق الدهب وغيره من مستلزمات الجواز

- إيه مشاكلك اليومية؟
المشاكل اليومية والبعبع البلدية، أنا موافق يأخذوا فلوس بس يسيبوني أكل عيش من غير مشاكل ومش كل شوية يجي أمين شرطة يأخدنى وأبات فى الحجز وكل تهمتى إنى عايز أكل عيش وبعدين هما قالوا قبل كده هنعملكم " دكاكين" وخدوا منى 4 آلاف جنيه وماحدش عمل حاجة وكل يوم بدفع 10جنيه وكل اللي واقف جنبي نفس النظام ولو مدفعتش هيأخدوا منى المكان اللي واقف فيه، عايز أعيش وأكل عيش بالحلال وطمعنا في حتته كشك ولا دكان مش أكتر أو البلدية تسيبنى في حالى.